Davíð Kristinsson

Nú höldum við áfram með nokkrar vel valdar æfingar til að rétta úr líkamsstöðu.

Það að hafa rétta líkamsstöðu minnkar líkur á tognun, íþróttameiðslum og vöðvabólgu. Það fyrsta sem við ættum að leggja áherslu á þegar við erum að byrja hreyfa okkur, hvort sem það er í íþróttum eða líkamsrækt, er að leiðrétta  líkamsstöðuna áður en við förum að hlaða á líkamann lóðum eða gera flóknar æfingar. Því miður er það orðið þannig í dag að hokin staða er mjög algeng og nánast orðin að eðlilegum hlut. Leiðréttum líkamsstöðu okkar, þannig náum við að minnka álag á liði, losa um vöðvabólgu og liðka líkamann.

Með því að gera eftirfarandi æfingar reglulega náum við frekar að komast í rétta líkamsstöðu. Þessar æfingar er hægt að gera hvar sem er og ekki þarf að kaupa nein áhöld. Þær eru ókeypis en það þarf að gera þær til þess að sjá árangur!

Brjóstbaksliðkun er ein af upphitunaræfingum hjá okkur í Heilsuþjálfun og þú sérð fljótlega árangurinn ef þú heldur þig við planið. Brjóstbaksliðkun skal taka 15* báðum megin og það er ekki verra ef þið getið tekið hana 1-3 svar á dag.

Framkvæmd æfingar: Farið niður á fjóra fætur, leggið aðra hendina aftaná hálsinn, hreyfið olnbogann uppí loft og niður í gólf og horfið á eftir.

Ef ég mætti aðeins vísa á eina æfingu fyrir einhvern af okkar viðskiptavinum þá væri það Kóbra. Með þessari æfingu erum við að vinna í vöðvum sem eru langir og veikir, og vantar einnig vöðvaþol. Við erum að vinna með hálsvöðvana, djúpu mjóbaksvöðvana og vöðvana milli herðablaðanna. Eða dúndurgóð æfing til að leiðrétta líkamsstöðu.

Framkvæmd æfingar:

Leggstu á kviðinn og hafðu hendur með síðu, Spenntu kviðinn og lyftu brjóstkassanum örlítið frá gólfi, snúðu upp á hendurnar þannig að lófar snúi niður en þumallinn upp og klemmdu herðablöðin vel saman.

Passið að höfuðið sé í réttri stöðu, hakan inn og horfið beint niður. Passið að lyfta sér ekki of hátt upp og vera slök/slakur í neðri útlimum.

Haldið þessari stöðu í 30-60 sek, 3-8*, þessa æfingu er gott að taka þrisvar í viku.

Gangi ykkur vel og munið það er ekki nóg að lesa bara um æfingar það þarf að gera þær líka. 

„Ég var að hugsa um að byrja að hreyfa mig og laga til í mataræðinu en hef bara engan tíma.“ Þær afsakanir sem við heyrum eru af öllum stærðum og gerðum. Meðalmaður vinnur eða er í skóla 8 tíma á dag. Við ættum einnig að sofa um 8 tíma á sólarhring að jafnaði yfir árið. Og þá eru 8 tímar eftir í leik og önnur skylduverkefni.

Slepptu afsökunum, þær þvælast bara fyrir þér. Það er engin afsökun gild fyrir því að sinna ekki heilsunni. Allir geta fundið eitthvað við sitt hæfi, annars væru Ólympíuleikar fatlaðra ekki til. Fyrst fatlaðir geta fundið eitthvað við sitt hæfi eiga þeir sem eru ófatlaðir fáar afsakanir.

Sumir tala um að þeir vilji ekki stela tíma frá börnunum eftir vinnu. Það hlýtur líka að skipta máli fyrir börnin að eiga foreldra sem hugsa um heilsuna og eru þannig góðar fyrirmyndir. Það má líka mæta fyrir vinnu því að flestar líkamsræktarstöðvar eru opnaðar snemma á morgnana og svo er alltaf hægt að nota útivistarsvæði til að ganga, skokka eða hlaupa. Það þarf ekki mikinn tíma til að bæta heilsuna. Hálftími á dag er bara 2% af sólarhringnum. Og 1% af tíma þínum er jafnvel nóg í upphafi − byrjaðu að hreyfa þig í hálftíma á dag eða annan hvern dag og skipuleggðu mataræðið betur.