Ókeypis brjóstastækkun

Já, þið lásuð rétt. En án skurðaðgerðar. Ef við skoðum hvernig ríflega helmingur þjóðarinnar vinnur þá erum við sitjandi mestallan daginn. Líkamsstaðan laskast við það. Það er ekki nóg með að við sitjum í vinnunni, heldur keyrum við í vinnuna sitjandi, borðum auðvitað sitjandi, sumir fara í líkamsrækt og skiptast á að setjast á vélarnar,  ekki góð aðferð, og að sjálfsögu sitjum við á kvöldin fyrir framan sjónvarpið eða við lestur. Hokin líkamsstaða og veikir mjaðmaréttuvöðvar (rassinn) eru orðin mjög algeng sjón hjá almenningi. Til þess að laga líkamsstöðuna mun ég á næstu vikum fara yfir nokkrar æfingar, liðkunaræfingar og teygjur sem hægt er að gera heima hjá sér. Þessar æfingar og teygjur munu hjálpa þér að leiðrétta líkamsstöðu þína og styrkja grundvallarvöðva sem styðja við stoðkerfi líkamans.

Við hjá Heilsuþjálfun byrjum allan okkar tíma á bandvefslosun með rúllum sem hjálpa okkur að liðka líkamann og vinna í vöðvum sem eru stífir.

Hvað er bandvefslosun?  Þegar við leggjumst á rúlluna slaknar á vöðvunum og aukning verður á blóðflæðinu til þeirra. Markmiðið er að leyfa rúllunni að vinna sig inní vöðvahnúta þá slaknar á þeim, liðleiki og hreyfanleiki líkamans verður þannig meiri. Þessir hnútar myndast í vöðvunum ef við t.d. vinnum of einhæfa vinnu og við það verður ofnotkun á ákveðnum vöðvum. Ef við erum með íþróttameiðsl eða vöðvabólgu þá eru hnútar á því svæði.  Með því að notfæra sér bandvefslosun hjálpum við líkamanum að ná ákjósanlegri virkni með því að endursetja skynnema í bandvefnum.

Hægt er að nota bandvefslosun á alla stærstu vöðva líkamans. Bandvefslosun með rúllu ber samt að varast fyrir fólk með sykursýki, vefjagigt og fyrir þá sem eru með æðahnúta. Rúllið 20-30 sekúndur yfir hvern og einn vöðvahóp. Eyðið meiri tíma í þá vöða sem eru mjög stífir. 

 

Rúllið bakvið brjóstkassa eða frá hálsi og að neðri hluta brjóstkassa. Hafið hendur bakvið háls og olnboga vísandi uppí loft til að ná meiri árangri. Byrjaðu með hendurnar á sama stað með olnbogana vísandi upp. Andaðu djúpt að þér, slakaðu á olnboganum aftur og andaðu frá þér í leiðinni. Bíddu í neðstu stöðu sem þú kemst í 5 sek án þess að missa mjóbakið mikið frá gólfinu. Endurtaktu þetta ferli 5 sinnum á 3-4 stöðum þar sem þú ert stífastur/stífust yfir brjóstbakið. Með því að liðka brjóstbakið náum við að rétta úr okkur og brjóstkassinn kemst í eðlilegri stöðu.

Í næstu viku mun ég fara yfir eina mikilvægustu æfinguna til að leiðrétta líkamsstöðu.

Davíð Kristinsson